Hia nau em ol EMTV nesenel nius hetlain long tok pisin…
1.LAE TOK WELKAM LONG OL LAE CITY DWELLERS
Ol sempion bilong NSL 2016, Lae City Dwellers I bin pundaun long Nadzab ples balus aste apinun, na kirap nogut long bikpela lain sapota I stap wetim ol.
Moa long 30 manmeri na pikinini I bin karim ol Morobe flek, na amamas.
Ol I sanap bihainim banis long ples balus taim Air Niugini balus I pundaun.
Ol I toktok isi isi taim ol narapela pasindia I bin lusim balus, na ol I singaut na amamas taim ol pilaia bilong City Dwellers I kamdaun wantaim NSL Kap trofi.
2.OL PABLIK SEKTA YUNION I BUNG LONG SOIM STRONG
Koalisen bilong ol yunion I makim ol wokmanmeri bilong ol gavman ejensi, I bin bung tude long soim strong bilong ol long sampela ol hevi wanwan ol memba yunion bilong ol I bungim.
Ol I bung long Jack Pidik park tude.
Ol wokmanmeri I kam long makim Komyunikesens Wokas Yunion, Eneji Wokas Yunion, na Maritaim na Trenspot Wokas Yunion.
3.NASFUND TOK OL MEMBA NO TINGTING LONG BIHAIN TAIM
Suparenesen Fan, Nasfund, I tok ol memba bilong ol I no moa tingting long bihain taim, na I wok yusim ol sevings program olsem wanpela sotpela taim sevings akaun.
Sif Ekseketiv Opisa bilong Nasfund, Ian Tarutia, I givim tok lukaut long ol memba olsem ol I mas larim sevings bilong ol I stap longpela taim bai em I ken groa gut.
Em I tok long las tripela yia, Nasfun I lukim planti moa memba I wok long rausim mani long ol sevings akaun bilong ol.
NA LONG SPOTS NIUS:
1.PNG FUTBOL MAN TIM REDI LONG BUNGIM SOLOMON AILANS
PNG Futbol tim bilong ol man I bung long Mosbi tete, pastaim long tupela pilai bilong ol agensim Nesenel Tim bilong Solomon Islands long Fonde dispela wik.
Skwad em I gat planti ol pilaia bilong Hekari United, na Telikom NSL Sempion, ol Lae Siti Dwellers.
https://youtube.com/watch?v=SI_iGLQavZI%3Ffeature%3Doembed%26wmode%3Dopaque%26showinfo%3D0%26showsearch%3D0%26rel%3D0
